Informatori ditor nr.2042-D

Prishtinë, e martë , 28 prill 1998

Edicioni i katërt (ora 19:20)

Konsultë e institucioneve shëndetësore të Kosovës

Prishtinë, 28 prill (QIK)

Në takimin e sotëm të përfaqësusëve të institucioneve shëndetësore të Kosovës morën pjesë Prof. dr. Alush A. Gashi - keshilltar i Kryetarit Rugova, Prof. Dr. Adem Limani - Ministër i Shëndetësisë, Prof. Dr. Hashim Maloku - Dekan i Fakultetit të Mjekësise, Prof. Dr. Binak Kastrati - kryetar i Shoqatës së Mjekëve të Kosovës dhe Prof. Dr. Isuf Dedushaj - Kryetar i Kryqit të Kuq të Kosovës.

U bisedua për gjendjen aktuale në shëndetësinë e Kosovës dhe për vështirësitë e imponuara nga ana e regjimit okupues në zona të ndryshme të Kosovës. Në takim u thekesua nevoja e intensifikimit të punës dhe aplikimit të doktrinës mjekësore të gjendjeve të tilla.

Prof. dr. Alsuh Gashi zhvilloi takime të veçanta edhe me përfaqësuesin e Sindikatës së Shëndetësisë së Kosovës Dr. Ilir Tolajn dhe me Prof. Dr. Simë Dobrecin, kryetar i Komisionit të Shëndetësisë në Kryesinë e LDK-së.

Konferencë për gazetarë në Partinë Liberale të Kosovës

Prishtinë, 28 prill (QIK)

Situata kritike në Kosovë, veçanërisht në Deçan dhe rrethinën e Gjakovës, imponon nevojën që qendrat relevante ndërkombëtare të ndërrmarrin masa konkrete me qëllim të parandalimit të një tragejdie e cila po i kanoset tërë Ballkanit dhe Evropës, tha në një konferencë për gazetarë Gjergj Dedaj, kryetar i PLK-së.

Në emër të partisë, ai u shprehu ngushëllime familjeve të të ekzekutuarëve ditët e fundit nga policia dhe armata serbe, duke vlerësuar se ata ranë për lirinë dhe pavarësinë e Kosovës.

PLK apeloi te Grupi i Kontaktit që në takimin e tyre të paraparë për nesër në Romë të mos marrin masa kozmetike ndaj Beogradit, nëse synojnë evitimin e konfliktit dhe tragjedisë në Kosovë, por hapa konkretë dhe preventivë duke ndëshkuar agresionin serb në Kosovë, i cili duhet të detyrohet të tërhiqet me forcat e tij nga Republika e Kosovës dhe nëse serbët nuk përfillin kërkesat e Grupit të Kontaktit, siç po ndodhë deri më tash nuk duhet të përjashtohet opcioni i një intervenimi ushtarak me karakter paqësor nga NATO dhe OKB-ja.

Z. Dedaj tha se PLK rikonfirmon qëndrimin e saj për zgjidhjen e çështjes së Kosovës me mjete politike dhe paqësore duke përjashtuar çdo formë të dhunës në Kosovë dhe rajon.

Duke pasur parasysh gjendjen kritike në Kosovë, PLK fton subjektet politike dhe jopolitike të Kosovës për bashkëpunim, vigjilencë dhe vetëpërmbajtje.

Z. Dedaj u bëri thirrje mjeteve të informimit dhe masmediave në gjuhën shqipe që të jenë objektive dhe në nivel me situatën e krijuar, sepse në një pjesë të tyre hetohen tendencat e subjektivizimit dhe të cenzurimit që nuk shpiejnë kah uniteti dhe që dëmtojnë çështjen kombëtare.

PLK falënderoi Grupin e partive Liberale, Demokratike dhe Reformatore të Evropës (ELDR) që po i kushton kujdes të veçantë çështjes së Kosovës. Ky grup organizoi më 21 prill në PE në Bruksel një konferencë të veçantë për Kosovën, në të cilën ishte i pranishëm edhe Dr. Klaus Kinkël, ndërsa PLK-në e përfaqësoi prof. Ibrahim Hasani, anëtar i KP të PLK-së.

M. Krasniqi: Qëllimi kryesor do të jetë realizimi i vullnetit të popullit të Kosovës

Prishtinë, 28 prill (QIK)

Në pyetjen se ku konsiston platforma e G-15, Mark Krasniqi, anëtar i këtij grupi dhe kryetar i PSHDK-së tha se ky grup kërkon që të bisedohet me serbët për zgjidhjen paqësore të çështjes së Kosovës. Ne kërkojmë që bisedimet të jenë në nivelin federativ e jo republikan të Serbisë. Ne kërkojmë që bisedat të fillojnë edhe pse në këto kushte, kjo është pika e dytë, dhe pika e tretë është që të jetë prezente pala e tretë ndërkombëtare, autoritative, e cila do të udhëheqë këto bisedime dhe që do të garantojë për zbatimin e marrëveshjes eventuale në qoftë se arrihet.

Në pyetjen se a do të ngulet këombë në bisedimet me palën jugosllave në pavarësinë e Kosovës apo është parashikuar që të pranohet opicioni i ndonjë autonomie, akademik Mark Krasniqi tha:

- Ne në asnjë mënyrë nuk do të heqim dorë nga përcaktimi i popullit për pavarësi. Qëllimi kryesor i gjithë atyre bisedave do të jetë realizimi i vullnetit të popullit të Kosovës për Kosovën Republikë, i cili është shpallur në referendumin gjithpopullor në vitin 1991, i cili duhet patjetër të bëhet dhe të zbatohet në qoftë se do pala serbe të mirret vesh me ne.

G-15 është një grup, i cili u formua nga presidenti Rugova për të zhvilluar negociata me palën jugosllave, tha ai.

Cili është statusi ligjor i këtij grupi në një kohë që siç dihet në Kosovë u zhvilluan zgjedhjet parlamentare dhe presidenciale dhe presupozohet që organet e tilla duhet të dalin nga Parlamenti dhe cili është statusi i këtij grupi, ishte pyejta tjetër.

Mark Krasniqi tha se ky grup ka statusin legjitim sepse është formuar nga presidenti i Republikës së Kosovës, dr. Ibrahim Rugova. Platforma e këtij grupi do të miratohet nga Parlamenti i Kosovës, i zgjedhur më 22 mars.

Në pyetjen se si PSHDK e gjykon veprimtarinë e LDK-së drejtuar nga Dr. Ibrahim Rugova në këtë fazë, akademik Ajeti tha se LDK është një lëvizje popullore sepse në te është pjesa më e madhe e popullit shqiptar në Kosovë. Kjo ka qenë partia e parë dhe populli mezi ka pritur që ta heqë nga qafa partinë komuniste dhe që të inkuadrohet në një parti shqiptare kombëtare. Ne mendojmë se LDK e ka orientimin kryesor realizimin Republikës së Kosovës. Andaj nuk ka arsye që ne të mos ta përkrahim këtë parti siç e përkrahim edhe partinë tonë, e cila ka të njëjtin qëllim, por jo vetëm partia jonë, por edhe partitë tjera kanë të njëjtin qëllim. Sipas informacioneve të fundit po krijohet një Lidhje e Re Demokratike e Kosovës, siç është quajtur, e cila pritet të drejtohet nga prof. Rexhep Qosja dhe ku janë një pjesë e anëtarëve të LDK-së të drejtuar nga Dr. Ibrahim Rugova. Cili është vlerësimi juaj për këtë? -ishte një pyetje.

- Është e drejtë e çdo kujt që të formojë një parti politike në Kosovë apo kudo, megjithëse ne shqiptarët jemi të prirur që të kemi sa më shumë parti, sa më shumë kryetarë, sa më shumë shefa, sa më shumë bajraktarë, është e drejtë e tyre. Por si duket kjo e drejtë e tyre shfrytëzohet në kohën më të papërshtatshme se kur ndonjëherë tjetër, sepse tash na duhet uniteti meqenëse kemi të gjithë një qëllim, kështuqë çdo përçarje të forcave tona intelektuale do të jetë vetëm ndarje e qëllimit tonë të përbashkët. Por besoj se nuk do të ketë ndonjë perspektivë kjo parti.

Në pyetjen se a mendonoi se forcat politike tani në fuqi në Shqipëri po i japin atë mbështetje që duhet t’i japin çështjes së Kosovës, akademik Krasniqi tha:

- Për fat të mirë në këto momente të vështira për Kosovën me kënaqësi konstatojmë se edhe në Shqipëri ku ka divergjenca të shumta partiake politike etj., Kosova i ka bashkuar këto forca në Shqipëri kështu që ne gëzojmë një përkrahje të gjithë popullit shqiptar, si të demokratëve, socialistëve etj.

PLK nuk ka anëtar të vetin në Këshillin e Emergjencës

Prishtinë, 28 prill (QIK)

PLK njofton opinionin se kjo parti nuk ka asnjë përfaqësues të saj e as të Liberalëve të Rinj të Kosovës në të ashtuquajturin Këshill Republikan të Emergjencës, me seli në Prishtinë.

Në njoftim thuhet se me rastin e konstitumit të këtij Këshilli, janë ftuar edhe përfaqësuesit e PLK-së dhe të Liberalëve të Rinj dhe kanë marrur pjesë në takimin e parë, por që në fillim janë hetuar disa tendenca të njohura për të gjithë, prandaj PLK ka hequr dorë nga angazhimi në këtë këshill.

Shpresojmë se ky Këshill do të kryejë detyrën e tij për të ndihmuar të gjihtë nevojtarët në Drenicë dhe viset tjera të Kosovës, për çka ne i dëshirojmë sukses në këtë detyrë të shenjët dhe kombëtare, thuhet në njoftim.

Andreata: Një status federal apo konfederal për Kosovën është i rëndësishëm

Prishtinë, 28 prill (QIK)

Ministri italian i mbrojtjes, Beniamino Andraata, një ditë para takimit të Grupit të Kontaktit tha se do të ishte mirë që statusi i ardhshëm i Kosovës të përmbajë një element federal ose konfederal.

Ai shfaqi bindjen se në qoftë se Serbia nuk do të ketë inteligjencë që të zgjidhë në kohën e duhur çështjen e Kosovës, është i paevitueshëm një copëtim tjetër i ish-Jugosllavisë, sepse çështja e Kosovës do të ketë implikime në të gjitha rajonet tjera të federatës së tashme jugosllave.

I pyetur se çka mendon për një republikë të Kosovës brenda federatës së tashme jugosllave, ai shfaqi besimin se një status federal apo konfederal për Kosovën është padyshim i rëndësishëm për zgjidhjen etnike të këtij problemi.

Në fshatin Bec përforcime të reja të ushtrisë serbe

Prishtinë, 28 prill (QIK)

Sot në mesditë, në fshatrat e Dushkajës po shkojnë përforcime të reja dhe të shumëta të ushtrisë serbe, bën të ditur KI i Degës së LDK-së në Gjakovë.

Po ashtu gjatë ditës së sotme bëhet e ditur se në Therrtoren e shpezëve në fshatin Bec u stacionuan 6 tanksa, 5 kamionë me ushtarë dhe 3 kamionë me armatim, mbrapa të cilëve gjendet edhe nga një top.

Një kamion me uniforma të policisë e me veshje antiplumb u shkarkua në oborrin e familjes serbe

Prishtinë, 28 prill (QIK)

Pardje në shtëpinë e serbit me emrin Mosha në fshatin Domaroc të Kamenicës, u shkarkua një kamion me uniforma të policisë serbe dhe veshje antiplumb, bën të ditur KI i Degës së LDK-së në Kamenicë.

Kamenicë: Policët serbë maltretuan disa kalimtarë shqiptarë

Prishtinë, 28 prill (QIK)

Mbrëmë që nga ora 19:00 deri në orët e vona të natës, rreth 20 policë serbë u vendosën në vendin e quajtur Dygidell, midis fshatrave Shipashnicë e Poshtme-Kelleleq, njofton KI i Degës së LDK-së në Kamenicë.

Njoftohet se policët i ndalën të gjithë kalimtarët e rastit, i nxorën nga vetura, si dhe i maltretuan në forma të ndryshme.

U hoq shtetrrethimi në fshatrat Balincë, Mleçan e Llazicë të Malishevës

Prishtinë, 28 prill (QIK)

Pas afro 48 orësh shtetrrethimi të plotë policor në fshatrat Balincë, Mleçan e Llazicë, mbrëmë vonë u hoq armatimi i rëndë policor e ushtarak serb nga këto tri fshatra, bën të ditur KI i Degës së LDK-së në Malishevë.

Të përkujtojmë se si pasojë e përforcimeve serbe, në SHF "Hivzi Sylejmani" të Llazicës është ndërprerë përkohësisht procesi mësimor, ndërsa ngjashëm u veprua edhe me nxënësit e shkollës së mesme "L. Poradeci" të Kijevës, të cilët mësimin e vijojnë në punktin e Llazicës.

Bëhet e ditur se në Kijevë, edhe më tej vazhdon gjendje e tensionuar dhe prani e madhe e forcave policore serbe, ku është vendosur një postbllok policor serb tash dy muaj.

Veprimtarët e LDK-së njoftojnë se në Kijevë janë dhjetëfishuar forcat e policisë serbe, ndërsa u janë bashkuar edhe civilët serbë të Kijevës, madje edhe punëtorët serbë të arsimit.

Elektorati në Gllogoc nuk e njeh Kryesinë e Degës

Prishtinë, 28 prill (QIK)

Dje u mbajt një mbledhje e kryetarëve të nëndegëve dhe aktiveve të Degës së LDK-së në Gllogoc. Ajo u mbajt duke pasur parasysh gjendjen e krijuar, pas komunikaëts për opinion nga ana e Kryesisë së deritashme në gazetën "Koha ditore" të së premtes më 24 prill, thuhet në një njoftim të "Bujkut".

Në bazë të diskutimeve dhe analizave të kësaj çështjeje pjesëmarrësit në këtë mbledhje njëzëri vlerësuan dhe konkluduan se disa qëndrime dhe veprime të Kryesisë së deritashme nuk përputhen me programin e LDK-së dhe Kryesinë e Këshillin e Përgjithshëm, në përputhje me statutin e LDK-së, orientimet dhe qëndrimet institucionale të LDK-së.

Për këtë shkak elektorati në mbledhjet e mbajtura në shumicën e aktiveve dhe nëndegëve u deklarua se nuk e njohin këtë Kryesi për shkak të veprimit dhe qëndrimit të tyre ndaj LDK-së.

Në mbledhjen e djeshme të zgjeruar pjesëmarrësit e nëndegëve dhe aktiveve distancohen nga emri i partisë së re të LRDK-së dhe e konsideron atë grup sektar me tendenca përçarëse.

Për organizimin e mëtejshëm ët punës së LDK-së deri në konstituimin e Kryesisë së re u propozua grupi punues, në mbështetje dhe përkrahje të plotë ët akteve statutare të LDK-së dhe akteve të tjera normative.

Njëherit nga kjo mbledhje u protestua kundër dhunës që po ushtrohet ndaj qytetarëve me theks të veçantë ndaj punëtorëve edukativo-arsimorë në postblloqet e vendosura policoro-ushtraake, dhe njëherit kërkojmë lirimin e menjëhershëm të mjekut Hafir Shala që nuk dihet për fatin e tij nga momenti i arrestimit, thuhet në njoftimin nga kjo mbledhje e përfaqëseusve të 27 nëndegëve dhe aktiveve të Degës së LDK-së në Gllogoc.

Nëndega e LDK-së në Magurë: LRDK-së, krijesë artificiale që s’ka asgjë të përbashkët me LDK-në

Prishtinë, 28 prill (QIK)

Nëndega e LDK-së në Magurë, njëherit nëndega më e madhe në komunën e Lipjanit, në kuadër të së cilës janë 8 aktive, në mbledhjen e saj të zgjeruar shqyrtoi situatën e vështirë në këtë regjion sidomos pas mobilizimit të popullsisë civile serbe të cilit janë vënë në shërbim të policisë serbe.

Ndër të tjera, në mbledhje u shqyrtua qëndrimi i disa anëtarëve të Degës së LDK-së në Lipjan, të cilët në vend që të jenë në mesin e nëndegëve dhe aktiveve për t’i bashkërenditur veprimet konform programit të LDK-së dhe situatës së krijuar, ata iu bashkuan LRDK-së, krijesë artificiale e cila nuk ka asgjë të përbashkët me LDK dhe si të tillë e konsiderojmë të dëmshme dhe të pamatur në këto momente në të cilat po kalon populli shqiptar.

Në këtë mbledhje u konfirmua përkrahja e fuqishme kryesisë së re të LDK-sëdhe kryetarit Dr. Ibrahim Rugova.

Nëndega VIII e Degës II: Në kuadrin e partisë ekzistuese nuk mund të themelohet parti tjetër

Prishtinë, 28 prill (QIK)

Në mbledhjen e Kryesisë së Nëndegës VIII të Degës II të LDK-së në Prishtinë, në mbledhjen e mbajtur ditën e shtunë, diskutoi lidhur me formimin e Këshillit nismëtar për themelimin e Lidhjes së Re Demokratike të Kosovës (LRDK).

Kryesia e Nëndegës VIII të Degës II të LDK-së në Prishtinë vlerëson se në kuadër e një partie ekzistuese nuk mund të themelohet një parti tjetër, siç pretendon Këshilli nismëtar i LRDK-së.

Formimi i Këshillit nismëtar të LRDK-së, në rrethanat aktuale në të cilat gjendet Republika e Kosovës, është veprim politikisht i dëmshëm.

Në kohën që populli shqiptar në Kosovë po përjeton çastet më të vështira nën thundrën e okupatorit serb, çdo iniciativë e tillë mund të ketë për pasojë plasaritje në unitetin politik, kështu që nuk është në interes të çështjes kombëtare.

Këto konkluzione janë mbështetur fuqimisht nga të gjithë të pranishmit në mledhje", thuhet në kumtesën e Kryesisë së kësaj nëndege.

Shtypi gjerman: Konflikti në Kosovë po del jashtë kontrollit

Prishtinë, 28 prill (QIK)

Zhvillimeve të fundit dramatike në Kosovë si pasojë e forcave ushtarako-policore e paramilitare serbe ndaj popullatës së shqiptare masmediat gjermane po i kushtojnë kujdes të merituar. Një përmbledhje të këtyre shkrimeve e transmetoi mbrëmë radio "Dojçe vele".

Në komentin e saj "Fitili është ndezur", gazeta gjermane "Frankfurter Rundshau" vë në dukje shkaqet që çuan në shkallëzimet e fundit të situatës në Kosovë, duke konsideruar ndër to si kryesor instrumentalizimin e opinionit publik serb për sabotimin e dialogut të ndërmjetësuar. Sundimi serb i "demokracisë", shkruan kjo gazetë, po vazhdon me një votim absolut kundër ndërmjetësimit ndërkombëtar në bisedimet për Kosovën populli serb arriti të justifikonte dhe madje të sanksiononte vullnetin e presidentit jugosllav Millosheviq. Kjo gazetë thekson se Millosheviqi duke i bërë manovrime të ndryshme bashkësisë ndërkombëtare ka stacionuar ndërkohë njësitet e ushtrisë jugosllave në kufirin me Shqipërinë, ndonëse asnjëri nuk e di me siguri, nëse kjo duhet marrë si provokacion, apo si shenjë e pafuqishmërisë së tij për t’u matur me UÇK-në, thuhet në këtë shkrim. E sigurt është vetëm që Millosheviqi i ndodhur në afërsi të fuçisë së barutit, luan me fitilin e ndezur dhe që çdo këmbim zjarri në Kosovë, e largon dialogun gjithmonë e më shumë.

Ndëkohë gazeta "Zidojçe Cajtung" shkruan se situata në Kosovë i vërtetoi të gjitha prognozat negative të deritashme për rrezikun e një konflikti të tillë për paqen dhe stabilitetin në rajon. Autori i këtij shkrimi ndalet në situatën e acaruar të krijuar në kufirin midis Kosovës dhe Shqipërisë në të cilin veçanërisht pas ngjarjeve të vitit të shkuar në Shqipëri janë vënë përballë njëra tjetrës dy forca ushtarake të pabarabarta. Alarmi i shkallës së parë të një ushtrie e policie të cilën Tirana mezi mundi ta riorganizonte në strukturat e saj themelore, nuk është shumë bindës, shkruan kjo gazetë, ndërkohë që edhe ndikimi që mund të kenë ndaj provokimeve të Beogradit, reagimet e pozitës dhe opozitës shqiptare gjithsesi kontradiktore me njëra tjetrën, është shumë i kufizuar.

Ndërkaq gazeta tjetër gjermane "Frankfurter Allgemajne Cajtung", në numrin e saj të djeshëm, botoi dje një shkrim të korrespondentit të saj për rajonin e Ballkanit më titull:"Këmbime zjarri në kufirin midis Kosovës dhe Shqipërisë" në të cilin sillen faktet e ilustruara me fotografi për vrasjet dhe varrosjen e viktimave të fundit në zonat kufitare.

Në Kosovë pati përsëri të vrarë, shkruan autori, këtë të hënë në një fshat shqiptar u hapën përsëri varre të reja. Përsëri jepen shënime të ndryshme për shkakun dhe mënyrën e zhvillimit të këmbimeve të zjarrit. Të kuptosh të vërtetën këto ditë në Kosovë, është shumë vështirë, konstaton autori. Ai shton së të dyja palët zmadhojnë aktet e kundërshtarit dhe fshehin të vetat. Pyetja që mbetet e hapur është se përse kufomat u sollën nga ushtria të shtunën pas dite të ngarkuara nëpër skoda të cilat i shkarkuan nëpër fshatra, pasi u ishte bërë autopsia pa i vënë në arkivole dhe pa ua dorëzuar ato më parë të afërmëve të tyre. Por, përfundon Matias Ryb, njoftimin e tij nga vendi i ngjarjes pavarësisht nga ajo që ka ndodhur ditët e fundit nëpër malet e Kosovës Perëndimore është për të pasur frikë se viktimat e shkaktuara, nuk do të jenë për fat të keq viktimat e fundit të një konflikti i cili gjithnjë e më shumë po del jashtë kontrollit, thuhej në këtë shkriml.

Ministri grek: Kosova, si një granatë dore e gatshme për të shpërthyer

Prishtinë, 28 prill (QIK)

Ministri grek i mbrojtjes Akis Coadopullos e cilësoi Kosovën si një granatë dore e gatshme për të shpërthyer në qoftë se ia tërheqim pak më shumë siguresën do të shpërthejë. Kjo duhet që t’i shqetësojë të gjithë. Kjo është edhe arsyeja tha ministri grek i mbrojtjes që të gjithë duhet të ushtrojnë presion ndaj palës shqiptare të Kosovës dhe asaj serbe për të filluar bisedimet, njoftoi mbrëmë radio BBC.

I njëjti burim theksonte se Coadopullos i ka mohuar pohimet se qeveria e Shqipërisë po i përkrah "rrebelët" në Kosovë. Sipas tij kryeministri Nano është distancuar qartë nga e ashtuquajtura UÇK, thuhej në këtë njoftim.

Dy vepra kushtuar historisë së Kosovës të autorëve të huaj

Prishtinë, 28 prill (QIK)

"Kosova një histori e shkurtër" me autor Noël Mallkol dhe libri tjetër shkruar nga Miranda Vikers me titull "Midis serbëve dhe shqiptarëve një histori e Kosovës", janë dy vepra kushtuar historisë së Kosovës për të cilat shkruan kritiku Tim Xhuda në revistën "New Zork Review of Books".

Kritiku Xhuda shkruan se kur filloi lufta në Kroaci dhe në Bosnje një nga problemet e gazetarëve ishte se ata kishin vështirë të gjenin libra të kohës që të flisnin për historinë e rajonit. Analistë të ndryshëm kishin pikëpamje krejt të ndryshme lidhur me shkaqet e konfliktit në Kosovë. Disa politikanë amerikanë dhe evropianë si Lorens Igëllberger argumentonin se ndërhyrja e huaj nuk kishte kuptim, pasi urrejtja midis popujve ballkanikë vazhdonte prej shekujsh. Kundërshtarët e kësaj pikëpamjeje thoshin se popujt e Ballkanit kanë treguar nga ana tjetër se ata janë të aftë të jetojnë në harmoni se përgjegjës për urrejtjen etnike janë kryesisht politikanët.

Kësaj here, thotë kritiku Tim Xhuda, debati duhet të jetë më i matur në saje të dy librave për historinë e Kosovës të cilët tani po i nënshtrohen gjykimit të kritikëve. Këta janë librat e parë në anglisht që përqëndrohen vetëm te Kosova.

Noël Malkolm është autori i respektuar britanik që ka shkruar një histori të Bosnjës, histori kjo e pritur mirë nga kritika. Kurse Miranda Vikers është një nga ekspertet më të njohura të Britanisë për Shqipërinë.

Në vitin 1995 ajo botoi historinë e parë të paanshme të Shqipërisë, kurse vitin e kaluar i bëri një studim rrugës plot zig-zage të Shqipërisë postkomuniste.

Libri i Noël Malkolmit merret më shumë me historinë e Kosovës, ndërsa ai i zonjës Vikers flet më tepër për situatën e kohëve të fundit në Kosovë. Ajo i shmanget linjës politike e konvencionale sipas së cilës serbët e këqinj u kundërvihen shqiptarëve trima. Por, shkruan në libër, në rast se e kaluara e Kosovës siç përjetohet nga të dy autorët mund të shërbejë si një tregues për të ardhmen e saj, atëherë fati i Kosovës është me të vërtetë i errët. Për më shumë se 500 vjet ky rajon ka kaluar nëpër një cikël pushtimesh, luftërash shtypjeje dhe eksodesh. Në të dy librat, shkruan kritiku Tim Xhuda, ai i Noël Malkolmit është më polemiku. Autori i ka vënë vetës detyrën të thyej pothuajse të gjitha pretendimet historike serbe për Kosovën. Autori jep argumente bindëse duke u nisur nga materiali arkivor i shekullit të XVII që ai vetë ka nxjerrë në dritë. Por, megjithatë, është për t’u habitur se ai nuk citon dokumentet serbe të së njëjtës epokë. Ai rendit 31 arkiva ku ka punur, por nuk thotë nëse ka vizituar ndonjë bibliotekë në Serbi. Të dy librat janë shkruar para se në Kosovë të fillonte dhuna e tanishme. Por përshkrimet që autorët iu bëjnë kryengritjeve të këtij shekulli në rajon na japin sfondin e nevojshëm për të kuptuar ngjarjet e sotme.

Në vitin 1912, pas pothuajse 500 vjetësh pushtimi osman, ushtria serbe u kthye në Kosovë por përsëri u dëbua nga trupat austriake dhe bullgare gjatë Luftës së Parë Botërore. Për serbët e Kosovës kthimi i ushtrisë serbe ishte një çlirim, ndërsa për shqiptarët që tash më përbënin shumicën, ai nuk qe gjë tjetër veçse një pushtim. Kur serbët u kthyen përsëri në vitin 1918 në mbarim të luftës, disa pjesë të Kosovës, sidomos Drenica, rezistuan.

Siç shkruan autori Noël Malkolm në vitin 1919 autoritetet jugosllave dërguan ushtrinë për ta shtypur rezistncën e shqiptarëve. Metodat e tyre nuk kanë ndryshuar shumë as sot e kësaj dite.

Noel Malkolm e mbaroi librin e tij tepër herët për të folur aty për UÇK, kurse zonja Vikers shkruan se komandantët e UÇK-së janë ish-oficerë të ushtrisë jugosllave dhe shumë prej tyre kanë luftuar kundër serbëve në Bosnje.

Herët a vonë, shkruan analisti Tim Xhuda, bisedimet për të ardhmen e Kosovës duhet të fillojnë. Shqiptarët u janë shmangur këtyre bisedimeve. Ata kërkojnë ndërmjetësimin ndërkombëtar dhe garancinë ndërkombëtare për çdo zgjidhje që mund të arrihet. Pas shumë rezistence serbët ndoshta do të pranojnë këtë me gjithë taktikën dhunuese të Milosheviqit. Serbët e dinë se vendet e NATO-s dhe Rusia do të mbështesin pretendimin e tyre se Kosova nuk mund të shkëputet nga Jugosllavia. Në rast se Kosova do të shkëputej kjo do të kishte dy pasoja të mënjehershme. E para do të ishte që Bosnja do të pushonte së ekzistuari, NATO-ja do ta kishte të vështirë të pengonte Republikën Serbe të Bosnjës për t’u bashkuar me Serbinë, në rast se Kosova do të bëhej e pavarur. Së dyti, Maqedonia do të shpërbëhej shumë shpejt dhe Shqipëria do të ndërhynte për të ndihmuar shqiptarët e atjeshëm. Kjo mund të qonte në shpërthimin e një lufte të përgjithshme ballkanike, ku do të ndërhynte si Greqia ashtu edhe Turqia.

Autorja e artikullit shkruan se shqiptarët e Kosovës kanë të paktën një ide të përgjithshme se për çfarë do të duhej të përcaktohen dhe se ata kanë një udhëheqës, të cilin e ndjek pjesa më e madhe e popullit. Përkundrazi serbët nuk kanë një pikëpamje koherente për Kosovën dhe askush nuk mund të thotë përfundimisht se çfarë kërkojnë ata, thuhet në fund të këtij artikulli kushtuar këtyre dy librave për historinë e Kosovës.

(Ora 19:20)