Sot u konfirmua edhe vrasja e Bedri Shalës nga Negroci në Junik. Ndërsa dje, afër Skënderajt, është gjetur një kofomë burri e moshës 20 vjeçare që ishte i mbuluar me dhe. Flokët i ka pak në të kuqe. Ka pantollone xhins (farmerka) dhe në pjesën e sipërme të trupit dhe në fytyrë ka të djegura dhe ka një dhëmb të thyer.

Nga të zhvendosurit e shumtë vetëm në Obri të Epërme në shkollën e fshatit ka rreth 180 të ardhur. Ata janë nga Klina Skënderaji dhe fshatrat e Gllogocit. rreth 80 % e tyre s'kanë as shtrojë as mbulojë. Gjithsej në këtë fshat janë vendosur 3015 veta. Atyre po u vijnë në ndihmë edhe shoqatat humanitare dhe këshilli i komunal i emergjencës, njofton KI i Degës së LDK në Gllogoc.

Pas gjuajtjeve të forcave ushtarake policore-ushtarake serbe në Sankovc u dogjën disa tuba sanë të Gani Jusufit, kurse zjarri iu kërcënua edhe shtëpive dhe banorëve vendës nga frika u largauan në mal. Të shtëna me fyshekë ndriçues ka pasur mbrëmë edhe nga "Ferronikeli" drejt lagjes së Binakjave të Gllobarit.

Burimet tona kanë konfirmuar se fshatrat e granatuara Loxhë, Graboc janë shkatërruar dhe djegur tërësisht. Njoftohet se janë vrarë këta persona: Ahmet Deli Shala (30) nga Loxha, Ahmet Bajram Krasniq Mekaj (31) dhe Hysen Jusuf Gashi (70) nga Graboci. Të plagosur janë: Rexhep Kelmendi, Agim Berisha, Abaz Çaka, Ruzhdi, Zekë e Burim Hoxha dhe Osman, Halit dhe Isuf Shala, të gjithë nga fshati Graboc. Ndërkaq nga fshati Loxhë janë plagosur: Valbonë Shala, shtatzënë 22 vjeçare, nënë e dy fëmijëve, Rukë Shala, plakë 70 vjeçare, Abedin Morina (23) si dhe dy persona të tjerë emrat të cilëve ende nuk dihen.

Që nga data 3 gusht nuk dihet asgjë për fatin e Beqir Mehmetaj, Naim Baraktaraj e Isa Balaj, të gjithë nga fshati Isniq. Ata ditën kritike kanë rënë një pusi nga forcat serbe në bjeshkët e këtij fshati të quajtura Mylyshe.