Vazhdon të mbretërojë gjendja e rëndë e popullatës së zhvendosur në komunën e Malishevës, e cila gjendet kryesisht nëpër malet e kësaj ane. Kështu në malet e Ponorcit gjenden mbi 5 mijë banorë, ndërsa në malet e Llapçevës mbi 4 mijë banorë, të cilët tash e sa ditë janë pa strehë mbi kokë. Atyre këto ditë iu kanë bashkuar edhe shumë banorë të rrethit të Gjakovës dhe të Deçanit, njofton KI i Degës së LDK në Malishevë. Popullata e zhvendosur e ka mbijetuar këtë gjendje në saje të ndihmës së pakursyer të disa fshatrave të Rahovecit, si Dejna, Ratkoci, Malësia e Vogël e Guri i Kuq.

Njoftohet se hordhitë policore e paramilitare serbe vazhdojnë të djegin e të shkatërrojnë fshatrat e Malishevës. Gjatë ditës së djeshme janë djegur e shkatërruar disa lagje të Bubavecit e Drenocit, pikërisht në momentin kur në to kishin filluar të ktheheshin disa banorë.

Sot paradite, një ekspeditë policore serbe ka bllokuar hyrje-daljet në fshatin Osek-Hylë dhe ka ndërhyrë në disa familje me pretekst të kërkimit të armëve, njofton KI i Degës së LDK-së në Gjakovë.

Edhe sot, në Gjakovë kanë vazhduar të vijnë banorë të ikur nga fshatrat e goditura në ofensivën e fundit të forcave serbe.

Njoftohet se një pjesë e popullatës, rreth 10 mijë veta, kryesisht gra, pleqë dhe fëmijë, vazhdojnë të qëndrojnë të pastrehuar, pa ushqim dhe pa kujdes mjekësor, në malet e anës së Dushkajës, Anësdrinit dhe në malet e Rekës së Keqe. Gjendja e tyre është mjaft e keqësuar dhe përveç urisë janë të kërcënuar nga sëmundjet e ndryshme. Ndërsa brenda në qytet dhe në paralegjet e qytetit janë rreth 50.000 të ikur nga vatrat e tyre.

Dje, duke filluar nga ora 18,00, forcat serbe me rafale të gjata përgjatë tërë Suharekës filluan të qëllojnë shtëpitë dhe lokalet përgjatë rrugës kryesore, pa shikuar se mund të qëllojnë ndonjë klimatar, për të përfunduar rrugëtimin dhe vazhdimin e të shtënave edhe me mitralozë të rëndë dhe me granatahedhës nga tankset, minahedhësit e nga kundërajrorët në drejtim të fshatit Sllapuzhan, njofton KI i Degës së LDK-së në Suharekë.

Nuk ka njoftime për pasojat eventuale të sulmit.

Në fshatin Bllacë policia serbe edhe më tej vazhdon djegien e shtëpive.

Mbrëmë rreth orës 21,00 është qëlluar edhe nga Hisari i Suharekës në drejtim të shtëpive poshtë tyre, duke rrezikuar kështu vrasjen e banorëve nëpër shtëpi të tyre.

Mijëra banorë të fshatrave të komunës së Malishevës tash disa javë po i kalojnë nën qiellin e hapur.

Parmbrëmë, që nga ora 0.30 deri në mëngjes serbët e fshatit Prilluzhë shtinë pandërprerë me armë në drejtim të fshatrave të Çiçavicës, si dhe në drejtim të Stanofcit të Poshtëm, njofton KI i Degës së LDK-së në Vushtrri.

Që nga 29 korriku, kur forcat serbe nisën një sulm të ashpër kundër fshatit Padalishtë, në këtë fshat janë granatuar, plaçkitur e djegur shumë shtëpi të shqiptarëve.

Siç njofton KI i Degës së LDK-së në Istog, në lagjen Ahmetaj janë granatuar, plaçkitur e djegur gjashtë shtëpi, si dhe janë djegur në tërësi grunajat. Në lagjen Imeraj, tri shtëpi janë dëmtuar rëndë nga granatimet, ndërsa tri të tjera janë plaçkitur, në lagjen Fetahaj është djegur tërësisht shtëpia e Rexhep Hotit, dy shtëpi janë dëmtuar, ndërsa pesë të tjera janë plaçkitur. Në lagjen e re, Loshaj e Shalaj, janë djegur pesë shtëpi, ndërsa të tjerat janë plaçkitur, sikundër që janë djegur edhe grunajat.

Në këtë situatë, kur banorët janë detyruar të largohen nga shtëpitë e tyre, forcat serbe pothuaj çdo ditë shtijnë drejt fshatit, duke penguar kështu banorët që të kthehen në shtëpitë e tyre.

Mbrëmë në orën 19.02 në fshatin Dimcë, në brezin e kufirit ndërmjet Kosovës e Maqedonisë, shpërtheu një minë. Komisioni për Informim i Degës së LDK-së në Han të Elezit nuk ka arritur të sigurojë inforrmacion për pasojat eventuale të këtij shpërthimi.

Kryesia e Degës së LDK-së në Klinë, në emër të anëtarësisë së saj përshëndetë formimin e Grupit negociator, i zgjedhur nga presidenti i Republikës së Kosovës, dr. Ibrahim Rugova, kërkon formimin e Qeverisë dhe institucionalizimin e jetës në Kosovë, njofton KI i Degës së LDK-së në Klinë.

Kryesia e Degës së LDK-së në Suharekë, përmes një komunikate për opinion, përkrahë formimin e Grupit negociator i zgjedhur nga presidenti Rugova, njofton KI i Degës së LDK-së në Suharekë.

"Kërkojmë nga Grupi negociator që të jenë pjesëmarrës edhe anëtarët tjerë, të cilët deri tash kanë kundërshtuar pa ndonjë arsye bindëse, meqë konsiderojmë se mospjesëmarja e tyre dëmton çështjen tonë. Njëherësh kërkojmë nga presidenti Rugova, që sa më parë të emërojë Qeverinë e Republikës së Kosovës, bazuar nga zgjedhjet e 22 marsit dhe të angazhohen në të edhe përfaqësues të partive politike, të cilat nuk kanë marrë pjesë në zgjedhje, por pa imponime".

Kryesia e Degës së LDK-së në Podujevë, në mbledhjen e saj të fundit përkrahu formimin e Grupit negociator i formuar nga presidenti i Republikës së Kosovës, dr. Ibrahim Rugova, bën të ditur KI i Degës së LDK-së në Podujevë.

Kjo Kryesi kërkon që të vazhdohet më me këmbëngultësi puna rreth formimit të Qeverisë së Republikës së Kosovës dhe organeve të tjera shtetërore në nivel republikan e lokal, me qëllim të krijimit të premisave për negociatat shqiptaro-serbe, të cilat duhet të fillojnë menjëherë.

Pardje në Prishtinë, u riaktivizua sërish Dega III e Forumit të Gruas së LDK-së në Prishtinë, në mbledhjen e të cilës morën pjesë edhe dr. Edi Shukriu, kryetare dhe Melihate Tërmkolli, sekretare e FG të LDK-së njofton KI i Degës III të LDK-së në Prishtinë.

Kryetarja e FG të LDK-së, dr. Edi Shukriu foli për gjendjen e rëndë aktuale në Kosovë, si pasojë e ofensivës së egër të forcave të ushtrisë e policisë serbe, si dhe për rëndësinë e riaktivizimit të aktivitetit të Degës III të FG të LDK-së në Prishtinë.

Kryetari i Partisë Parlamentare të Kosovës Adem Demaçi, të cilin ditë më parë UÇK-ja e emëroi përfaqësues të saj politik, deklaroi për radio B-92 të Beogradit se UÇK-ja do të ndryshojë mënyrën e veprimit, transmeton gazeta "Blic".

- Ata (UÇK) tani gjenden në një situatë që t'i kthehen një metode krejtësisht tjetër (luftës) e cila do të jetë edhe më e vështirë edhe më e papranueshme dhe më e keqe për regjimin serb.

Ai tha se rolin përfaqësues politik të UÇK-së e ka pranuar me "dëshirë që të jetë katalizator i zgjidhjes së krizës së Kosovës në të cilën do të marrin pjesë pala shqiptare e serbe dhe bashkësia ndërkombëtare".

Në pyetjen nëse e pranon thirrjen e Ibrahim Rugovës që të kyçet në ekipin e posaemëruar negociator të shqiptarëve, Demaçi tha se nuk e di se është ftuar dhe shtoi:

"Qëndrimi im është qëndrim i UÇK-së se Rugova është kryetar në letër, se aty ekziston njëfarë parlamenti përsëri në letër, kështu që njerëzit në të vërtetë nuk përfaqësojnë kurrfarë force e cila do të ishte në gjendje të ndryshojë situatën", tha Demaçi dhe shtoi se "nuk ka ndërmend" të marrë pjesë në grupet negociatore "të cilat kanë lidhje me Rugovën".

Kryetari i Lëvizjes Demokratike Shqiptare, Rexhep Qosja, sqaroi sot në gazetën "Koha ditore" se nuk e ka përshëndetur formimin e Grupit Negociator të Kosovës, siç ka dalë në titullin e një pjese të deklaratës së tij dhënë "Zërit të Amerikës", të botuar nga kjo gazetë.

"Në të përditshmen "Koha ditore", më 15.08.1998, është botuar një pjesë e deklaratës sime të emetuar në 'Zërin e Amerikës', mbi Grupin e posaformuar për bisedime me palën jugosllave. Megjithëse edhe prej pjesës së botuar të deklaratës del qartë mospajtimi im, ashtu si edhe i Lëvizjes Demokratike Shqiptare, i PPK-së dhe i UNIKOMB-it, në kumtesën e përbashkët lidhur me këtë hap të dëmshëm politik, redaksia e gazetës ia ka vënë këtë kryetitull: 'Kryetari i LDSH-së përshëndeti formimin e ekipit negociues...'!

Komanda e NATO-s për Evropën Jugore (AFSOUTH) i bëri të ditura të dhënat esenciale nga plani i stërvitjeve ushtarake në Shqipëri, të cilat zhvillohen në kuadrin e programit "Partneriteti për Paqe", fillojnë sot e zgjasin deri më 22 gusht, njofton "Bujku".

Në stërvitje do të marrin pjesë 14 shtete, ndërsa qëllimi kyç i stërvitjes është zhvillimi i kuptimit të përbashkët të operacionit për mbështetje paqes, doktrinës ushtarake e mënyrave të stërvitjeve dhe ushtrimi i bashkëveprimit të forcave të armatosura të shteteve anëtare.

Do të ushtrohen operacionet e kërkimit dhe të shpëtimit, mbështetje të afërta ajrore, evakuime sanitare, operacionet ajrore dhe veprimet e këmbësorisë në mbështetje të paqes.

Në kumtesën e publikuar në buletinin e Ambasadës amerikane në Beograd thuhet se "këto stërvitje do të ndihmojnë që të përsosen procedurat dhe kërkesat e nevojshme për bashkëpunim efikas të forcave ushtarake të NATO-s dhe vendeve anëtare të programit "Partneriteti për Paqe".

Shqipëria do të marrë pjesë na këto manovra me 120 ushtarë dhe me dy aeroplanë të tipit Mig-19 dhe MI-4; Belgjika me dy aeroplanë të tipit F-16A; Kanadaja me 2 aeroplanë të tipit F-16A;

Franca me 60 ushtarë dhe dy fluturake "Jaguar"; Gjermania me 140 ushtarë, dy fluturake të tipit "Tornado" dhe një aeroplan C-160; Greqia me 100 ushtarë, një ekip mobil stomatologësh, një fluturake "C-130" dhe tri fluturake për mbështetje të afërt ajrore; Italia me 250 ushtarë, katër fluturake "AMX", dy "AV8B", dy "AB212", dy "SH-3D" dhe dy "AB-205"; Lituania me 40 ushtarë; Holanda me katër aeroplanë të tipit "F-16"; Rusia me 40 ushtarë;

Spanja me 130 ushtarë dhe dy fluturake "UH-1"; Turqia me 150 ushtarë, dy fluturake "C-130", dy "GR-7" dhe "CH-47"; SHBA-të me 250 ushtarë, gjashtë fluturake "AV-8B", njëzet "CH-46", katër "CH-53", katër "AH1/2", dy "UH-1", dy aeroplanë "F-16" dhe një "C-130".

Me rastin e aksioneve të forcave ushtarake policore serbe në Junik janë konfiskuar shumë armë: një top i vogël, mina, 6 minahedhës, 5 minahedhës dore, disa qindra pushkë, ndërsa janë arrestuar 9 shqiptarë të cilët nuk dinë asnjë fjalë serbisht, shkruan gazeta "Blic" në një reportazh nga Juniku. Në Junik është rëzuar minarja e xhamisë, ndërsa nëpër tërë fshatin ka pasur shumë bunkerë dhe frengji nëpër shtëpi si dhe qendra të snajperëve, shkruan kjo gazetë.

Pjesëtarët e policisë serbe në Prishtinë të shtunën ua treguan gazetarëve në Prishtinë një pjesë të armatimit dhe të pajisjeve të konfiskuara nga UÇK-ja gjatë luftimeve në fshatin Glloxhan. Para selisë së policisë serbe në Ajvali, gazetarëve iu tregua një pjesë e arkivit të UÇK-së të gjetur në Malishevë si dhe listat e njerëzve dhe të armatimeve, shkruan shtypi serb.

Njazi Aqifi i pandehur për vrasjen e magnatit të njohur hungarez të shtypit, Janosh Fenje në shkurt të këtij viti, iu dorëzua policisë hungareze.

Pas vrasjes policia më 21 maj lëshoi një fletarrest për 3 shqiptarë të Kosovës të pandehur për këtë vrasje. Atëherë u botua fotografia e Njaziut dhe fotoroboti i dy të pandehurve të tjerë. Para se të kalojë kufirin jugosllavo-hungarez afër Horgoshit, ai gazetarëve u deklaroi se po dorëzohet vullnetarisht "për t'u liruar nga dyshimi për vrasje".

Parmbrëmë rreth orës 2.50 pas mesnate, në mes të Tetovës, në kafiterinë "Kobra", ndodhi një incident i rëndë - rrahje grupore e të rinjve maqedonas dhe shqiptarë, njofton "Bujku".

Sipas kumtesës së Drejtorisë së Punëve të Brendshme të Tetovës, në këtë rrahje grupore janë lënduar vetëm dy veta, ndërsa janë përdorur armë zjarri, thika e shkopinj bejzbolli.

Kjo rrahje ka ndodhur ndërmjet grupit të vojvodëve maqedonas, të rinj të njohur për nxitje të incidenteve dhe për prishje të rendit e të qetësisë publike, dhe grupit të të rinjve shqiptarë, të njohur më shumë me emrin Grupi i Selim Gucit, gjithashtu të njohur për prishje të rendit dhe të qetësisë publike.

Televizioni çek kumtoi se Ivan Diken, i cili u plagos në afërsi të kufirit Shqipëri - Kosovë, "është një turist i thjeshtë, e jo gazetar i mediave gjermane", bën të ditur "Koha ditore".