Sot nga ora 5:30, deri në orën 6:30 të mëngjesit, forcat e ushtrisë serbe granatuan me artileri të rëndë fshatin Pantinë dhe fshatrat tjera përreth, njofton KI i Degës së LDK-së në Vushtrri.

Dje, policia serbe bastisi shtëpitë e katër veprimtarëve humanitarë nga komuna e Kamenicës, të cilët edhe i keqtrajtoi fizikisht, bën të ditur KI i Degës së LDK-së në Kamenicë.

Njoftohet se një ekspeditë e policisë serbe e pajisur me tri vetura bastisi shtëpinë e mr. Refik N. Kryeziut, dr. Faredin Sh. Kryeziut e të Ibrahim D. Shurdhanit në Rogaçicë dhe atë të dr. Izet H. Kekës në Muçivërc.

Edhe mbrëmë, paramilitarët serbë të fshatit Prilluzhë, vazhduan që t'i provokojnë familjet shqiptare në fshatin Stanoc i Epërm, njofton KI i Degës së LDK-së në Vushtri.

Dje rreth orës 15:00 në Gjakovë, policia serbe arrestoi në shtëpinë e tij Musa Kurhaskun, korrespodent i të përditshmes "Koha ditore", njofton KI i Degës së LDK-së në Gjakovë.

Bëhet e ditur se përveç shtëpisë, policia serbe ka bastisur edhe lokalin e tij dhe konfiskoi materialet e punës, aparatin e faxit dhe notesin e telefonit.

Bëhet e ditur se gazetari Musa Kurhasku nga policia serbe është thirrur edhe më herët, për të ndërmjetësuar për një person në Rahovec, për të cilin theksohet se është zënë rob nga pjesëtarët e UÇK-së.