Më 24 gusht të këtij viti në fshatin Duhël, forcat serbe kanë vrarë e masakruar Ilir Jemin Perteshin (21) nga Duhla, i cili ende nuk është varrosur, pasi është vështirë të depërtohet nga forcat serbe deri në vendin ku i ndjeri është vrarë, bën të ditur KI i Degës së LDK-së në Suharekë.

Njoftohet se në vendin ku është vrarë Iliri, ka edhe shqiptarë të tjerë të vrarë nga forcat serbe.

Edhe gjatë ditës së sotme, po vazhdon djegia e nëntë fshatrave shqiptare nga forcat e ushtrisë, policisë dhe të paramilitarëve serbë, njofton KI i Degës së LDK-së në Suharekë.

Dje rreth orës 9:00 të mëngjesit në fshatin Lum madh, policia serbe arrestoi Rizah Durakun (30), derisa ai po udhëtonte me vajzën e axhës së tij Teutë Durakun (18) për në fshatin Breznicë, njofton KI i Degës së LDK-së në Vushtrri.

Nga 14 qershori e deri në ditën e sotme, forcat policore, ushtarake e paramilitare serbe ndërmorën ofensivën në këto fshatra të Shtimes, Carralevë, Zborc, Reçak, Petrovë, Mollopolc, Pjetërshticë, Belincë, Zukë, Karaçicë, Racë e Petrovë të Re, njofton KI i Degës së LDK-së në Shtime.

Deri tash në këtë komunë forcat serbe kanë vrarë 20 shqiptarë, 11 prej të tyre të familjes Selim Asllani nga Ranca. Njoftohet se prej tyre 7 janë fëmijë, 4 nxënës, 3 gra dhe 6 burra. Ndërkaq, në këtë komunë numri i të plagosurve shqiptarë nga forcat serbe arrinë në 23 veta, ndërsa janë arrestuar 3 shqiptarë dhe 4 të tjerë janë zhdukur, për fatin e të cilëve ende nuk dihet asgjë.

Bëhet e ditur se në komunën e Shtimes, forcat serbe deri tash kanë djegur 465 shtëpi, ndërsa numri i shqiptarëve të zhvendosur arrinë në 11.750 veta, të cilët vazhdojnë të jetojnë nën qiellin e hapur. Njoftohet se një numër i këtyre banorëve është vendosur në komunën e Ferizajt dhe të Lipjanit.

Mbi 10.000 shqiptarë, të larguar nga shtëpitë e tyre, etojnë përkohësisht në fshatrat Sverkë e Volljakë dhe shumica prej tyre nuk kanë as gjërat elementare për jetë, njofton KI i Degës së LDK-së në Klinë.

Si pasojë e jetës në kushte të rënda dhe mungesës së plotë të trajtimit mjekësor, kanë vdekur Besnik Brahim Olluri, 2 vjeç, nga Rakovina, Pajtime Xhelal Millaku, 2 vjeçe, nga Ujëmira, dhe Shaban Gashi (72) nga Reshtani.

Dje në Mitrovicë, nga ora 8:00 deri në orën 14:00, katër policë serbë të cilëve u printe njëfarë Ratko Antonijeviq, i njohur për dhunë kundër shqiptarëve, i keqtrajtuan disa kalimtarë shqiptarë, njofton KI i Degës së LDK-së në Mitrovicë.

Dje rreth orës 10 forcat serbe kanë keqtrajtuar fizikisht fëmijët Besnik Sheki, Avdush Suma, Daut Suma, të gjithë nga fshati Vincë, të cilët ishin duke i ruajtur bagëtinë, njofton KI i Degës së LDK-së në Han të Elezit.

Më 26 gusht rreth orës 18:00 në afërsi të fshatit Stanoc i Epërm, njëfarë Salih Krasniqi, anëtar i Partisë Socialiste të Serbisë dhe kolaboracionist i njohur nga fshati Breznicë së bashku me tre djemtë e tij, keqtrajtuan fizikisht Hilmi Gashin, njofton KI i Degës së LDK-së në Vushtrri.

Njoftohet se Hilmi Gashi është keqtrajtuar rreth një orë dhe nga kolaboracionistët shqiptarë është kërcënuar edhe me likuidim fizik.

Që nga 28 korriku i këtij viti, ende nuk dihet asgjë për fatin e bashkëshortëve Vesel Zenel Gashi (75) dhe të Xhevë Gashit (75) e paralizuar nga Balinci i Klinës, bën të ditur KI i Degës së LDK-së në Pejë.

Që nga 24 gushti i këtij viti, kur forcat serbe sulmuan fshatin Shtupeq i Vogël të Rugovës, ka humbur pa gjurmë Mustafë Isuf Lajçi dhe motra e tij Dude Isuf Lajçi, i deklaroi KI të Degës së LD në Rozhajë, Ali Muriqi.

Haki Smajl Bacaj (32) nga fshati Gremnik, baba i tre fëmijëve, është zhdukur nga data 13 maj dhe për të nuk dihet asgjë.

Përfaqësuesi politik i UÇK-së, Adem Demaçi, deklaroi të dielën se "nuk beson që pjesëtarët e UÇK-së e kanë bërë krimin në Kleçkë, për shkak se regjimi serb është i shkathët në inskenimin e situatave dhe skenave".

"Vetëm në qoftë se vjen komisioni ndërkombëtar i mjekëve dhe i personave kompetentë që të hulumtojë rastin, mund ta dënoj këtë gjë", i tha Demaçi radios beogradase "Radio B92".

Ai tha se nuk beson që "pjesëtarët e UÇK-së kanë qenë në mundësi të kryejnë këtë krim, për shkak se nuk kanë arsye që të bëjnë një gjë të tillë, që është parimisht në kundërshtim me filozofinë e kësaj ushtrie, e cila nuk lufton kundër popullit serb, por kundër regjimit serb".

Demaçi tha se ai mbi pjesëtarët e UÇK-së nuk ka kurrfarë kontrolli dhe se "do të ishte fantastike në qoftë se njeriu do të mund t'i kontrollonte ata". "Unë nuk e kontrolloj UÇK-në, e as ajo nuk më kontrollon mua. Unë jam vetëm përfaqësues politik i asaj pjese që nuk përdor mjete paqësore", tha Demaçi duke shtuar se ai është "dorë e shtrirë për t'u gjetur zgjidhja politike, paqësore dhe demokratike".

Duke i komentuar disa deklarata të politikanëve serbë se ai do të duhej të burgosej për shkak të deklarimeve të veta, Demaçi vlerësoi se regjimi serb ia përshkruan atij edhe ato gjëra që nuk i ka thënë.

Pyetjes së gazetarit të "Radio B92" se a mos jep ai deklarata provokative, në mënyrë që të provokojë arrestimin e tij dhe kështu të ngritë rejtingun e vet në mesin e shqiptarëve, Demaçi tha:

"Dikush, si duket, është i interesuar që të m'i mvesh disa gjëra, të cilat unë nuk i kam thënë. Në qoftë se është në interes të dikujt që të arrestohem, unë nuk ik nga ajo dhe do t'i isha falënderues në qoftë se m'i ndërpren këto vuajtje dhe të më fut në burg", tha Demaçi.

Përfaqësuesi i Shtabit të UÇK-së transmetoi BBC-së në gjuhën shqipe, përmes telefonit, një kumtesë, në të cilën thuhet se lajmi, si duket, i përgatitur për kohë të gjatë dhe me kujdes nga makineria ushtarake dhe propagandistike e okupatorit serb për gjojma ekzistimin e një varri kolektiv të qytetarëve serbë në fshatin Kleçkë, s'është gjë tjetër, pos një gënjeshtër e regjimit serb që ka për qëllim kompromitimin e luftës sonë të drejtë dhe çlirimtare. Kjo mund të shihet - vazhdon kumtesa - nga ndryshimi i disahershëm i lajmit rreth numrit të viktimave, nga 8 në 12 e pastaj në 22, nga konstatimi i shpejtuar se kafkat na qenkan serbe, nga prezentimi i dy dëshmitarëve të rrejshëm që kurrë nuk kanë qenë ushtarë të UÇK-së, por kanë qenë kolaboracionistë dhe kontrabandistë që kanë bashkëpunuar dhe vazhdojnë të bashkëpunojnë me okupatorin.

UÇK nuk është marrë kurrë me vrasjen e qytetarëve serbë e lëre me vrasjen e grave dhe të fëmijëve. Jemi të bindur se skeletet e eksponuara para kamerave televizive janë të qytetarëve të vrarë shqiptarë, kohë më parë. Ky është një insistim për të mbuluar krimin e kryer nga militarët dhe paramiltarët serbë mbi qytetarët e pafajshëm shqiptarë dhe për të akuzuar UÇK-në si terroriste.

Sekretarja e Shtetit amerikan, Medlin Ollbrajt, gjatë vizitës që dje ia bëri Republikës Serbe të Bosnjës (RS), theksoi se Qeveria SHBA është shprehur se duhet të ndërpritet dhuna në Kosovë, sepse konfliktet vetëm se mund të rezultojnë me konflikte të reja.

"Koha ditore" njofton se ajo, në një konferencë shtypi, të mbajtur në Bijelinë, tha se Qeveria amerikane në çështjen e Kosovës është aktualisht duke punuar në nivelin diplomatik, humanitar dhe ushtarak.

Ollbrajt më tej tha se ambasadori amerikan në IRJ të Maqedonisë, Kristofer Hill, në kuadër të misionit të tij ndërmjetësues në Kosovë, do të tentojë javën e ardhshme që me përpjekjet intensive të ulë shqiptarët kosovarë në tryezën e bisedimeve.

Ajo parlajmëroi edhe mundësinë që Qeveria amerikane të ndajë edhe 20 milionë dollarë të tjerë ndihmë humanitare "për popullatën e rrezikuar në Kosovë" dhe precizoi se në atë drejtim tashmë në Kosovë janë paguar 10 milionë dollarë.

Ollbrajt tha se aspekti i tretë "është përdorimi i mundshëm i forcës". Ajo tha se planifikimi i mëtejmë në NATO vazhdon dhe se në këtë moment janë duke u studiuar forcat, të cilat mund të përdoren për atë qëllim. Ajo paralajmëroi se në Sarajevë do të bisedojë me komandantin suprem të forcave të NATO-s në Evropë, gjeneralin Vesli Klark.

Duke theksuar se problemet, të cilat kanë ekzistuar në Bosnjë-Hercegovinë dhe problemet në Kosovë janë relativisht të ndryshme, ajo vuri në dukje se, para së gjithash, është për një zgjidhje diplomatike të situatës në Kosovë.

E pyetur se a do të rrezikohej shteti multietnik në Bosnjë-Hercegovinë me realizimin eventual të kërkesave të shqiptarëve për pavarësi në Kosovë, Olbrajt tha se SHBA-ja që nga fillimi përkrah "një lloj të autonomisë së forcuar për Kosovën".

Ajo tha se një zgjidhje e tillë do të mundësonte që njerëzit e origjinës së ndryshme etnike të jetojnë bashkërisht.

Presidenti amerikan Bill Klinton sot viziton Moskën e tronditur nga kriza. Për të martën e të mërkurën janë paraparë takime me presidentin rus Boris Jelcin.

Avokati nga Beogradi, Vlladan Batiq, i cili njëherit është edhe kryetar i Partisë Demokristiane të Serbisë, i ka dërugar dje prokurorisë publike në Prishtinë kallëzimin penal kundër Adem Demaçit, përfaqësuesit politik të UÇK-së, njofton gazeta "D.Telegraf".

Gazetës në fjalë Batiq i deklaroi se "aktiviteti i Adem Demaçit qysh moti ka kaluar nga sferat e luftës politike në kriminalitet të llojit më të keq". Ai thotë se Demaçi është "përfaqësues politik i terrorizmit gjenocidal në Kosovë, sidomos pas zbulimit të krematoriumit të civilëve serbë në fshatin Kleçkë".

Ai gjithashtu e akuzon Demaçin se kinse "disa herë, në shumë vende dhe në mënyra të ndryshme, e sidomos nëpërmjet mjeteve të vendit dhe të huaja të informacionit ka nxitur vepra të rënda penale".

Regjimi serb ka paralajmëruar në tetor procese masive gjyqësore kundër 300 shqiptarëve, ndërkohë që janë duke u zhvilluar procedurat hetimore, njofton shtypi i sotëm serb, duke cituar ministrin serb të judikaturës Dragolub Jankoviq.

Situata në Kosovë do të anojë drejt një mbikëqyrjeje të jashtme, drejt një lloji protektorati të qetë ose të fshehtë, tha Vojisllav Koshtunica, lider i Partisë Demokratike të Serbisë. Sipas fjalëve të tij "po i afrohemi situatës" e cila të përkujton zgjidhjen kushtetuese nga viti 1974, ndoshta me ndonjë autorizim më të madh për Kosovën sesa atëherë.