Në njoftim thuhet se forcat serbe po e granatojnë fshatin nga pozicioni i tyre te Tabet e Llapashticës.

Detonimet e fuqishme dhe të shtënat po dëgjohen edhe në qytet.

Në Llapashticë, për një takim me komandantin e Zonës Operative të Llapit të UÇK-së, dje ishte udhëheqësi i Misionit Verifikues të OSBE-së, Uilliam Uoker.

Po ky burim bën të ditur se dje pasdite dhe në orët e mbrëmjes,

në Godishnjak dhe fshatrat e afërta janë zhvilluar luftime të ashpra mes forcave serbe dhe luftëtarëve të UÇK-së.

Nuk dihet më shumë për pasojat e këtyre luftimeve, por dëshmitarët kanë parë tym dhe shtëpi që digjeshin në Godishnjak.

Po dje, policia ka arrestuar pronarët e autobusit të firmës "Mentori turs", Beqir e Arsim Mustafën, të cilët u liruan pasi u mbajtën rreth një orë në stacionin e policisë në Podujevë.

Ndërkohë, policia ka liruar tre nga katër shqiptarët që u arrestuan më 14 shkurt te udhëkryqi i rrugës për Kërpimeh derisa po udhëtonin me veturën e tyre.

PO kështu, janë liruar edhe dy shqiptarë të tjerë të arrestuar të njëjtën ditë Xhezair Govori nga fshati Sfeçël dhe Besnik Rama nga Turuçica.

Gjatë kësaj kohe, policia serbe ka legjitimuar disa qytetarë shqiptarë e në veçanti nxënësit derisa po ktheheshin nga mësimi.

Në organet e sigurimit serb, z. Kryeziu u pyet për kinse organizimin e UÇK-së në Dushanovë, se a po organizohen roje gjatë natës në fshatin e tij dhe për çështje të tjera.