Gjendje shumë e tensionuar po mbretëron edhe në fshatrat Bukosh e Novolan, ku janë përqendruar forca të mëdha serbe me një arsenal të madh luftarak.

I njëjti burim konfirmon se popullata shqiptare e këtyre fshatrave ka filluar të zhvendoset me të madhe dhe ajo ka mësyer qytezën e Vushtrrisë, por forca të mëdha të policisë serbe kanë bllokuar rrugën te Ura e gurit në hyrje të Vushtrrisë. Policia serbe nuk po e lejon popullatën shqiptare që të hyjë në qytezë dhe vazhdimisht po keqtrajton brutalisht qytetarë shqiptarë moshash të ndryshme.

Ende nuk ka njoftime për viktima në njerëz, por njoftohet se nga pasojat e artilerisë serbe dëmet materiale janë të mëdha.

KI i Degës së LDK-së në Podujevë njofton se në orën 11.30 forcat serbe të vendosura te Tabet e Llapashticës filluan të granatojnë Llapashticën. Granatimet zgjatën deri në orën 12, kur u ndërprenë, por filluan sërish rreth orës 12.30 dhe po vazhdojnë ende.

Njoftohet gjithashtu se forcat serbe po granatojnë edhe fsdhatin Buricë.

Deri tash nuk ka njoftime për pasojat e këtyre sulmeve.

Po ashtu edhe sot që në orët e hershme të mëngjesit, ka patur lëvizje të mëdha të forcave serbe të cilat nga Hani i Elezit kanë arritur në Kaçanik.

Bëhet e ditur se forcat serbe janë të pajisura me autoblinda dhe armë të tjera të rënda, ndërkohë që ato janë vendosur edhe në drejtim të Malishevës, pastaj në vendin e quajtur "Te rrasat" dhe në disa vende të tjera.

Një pjesë e popullatës shqiptare e cila kohë më parë qe rikthyer në Rahovec, sërish i ka braktisur vatrat e tyre nga frika e ndonjë masakri tjetër të forcave serbe.

Gjatë kësaj vizite u konstatua se në këtë fshat nuk ka ka kushte për kthimin e popullsisë së zhvendosur, për shkak se asnjë shtëpi e fshatit nuk ka mbetur pa u shkatërruar ose dëmtuar gjatë ofensivave të forcave serbe, gjatë verës. Shoqata Humanitare MED AIR po bën përpjekje për krijimin e kushteve elementare për kthimin e banorëve të zhvendosur nga ky fshat.