
Fillim Kategoritë Opinione Ekskluzive Galeria Arkivi Marketing Kontakt

Pse Isa?

Shkruan: Prof. Ass. Dr. Jur. Korab R. Sejdiu Është e çuditshme ta përcjellësh fushatën këto ditë, së paku atë që po bëhet në Prishtinë. E them këtë sepse ka shumë njerëz që angazhohen për kandidatin e tyre, mirëpo jo duke i treguar të mirat e kandidatit të cilin e përkrahin, mirëpo duke u munduar që ta njollosin kandidatin tjetër. Teoria e tyre është e thjeshtë “kur s’ke kandidat për të lavdëruar, mundohesh t’i fyesh të tjerët që t’i ulësh në nivelin e kandidatit tënd”. Për zgjedhjet e 15 nëntorit, kandidati i im i preferuar është Prof. Dr. Isa Mustafa, kryetari i tanishëm, dhe si duket i ardhshmi i Prishtinës, që si kandidati më i fortë është bërë shënjestër e shumicës së sulmeve që përfshijnë edhe gënjeshtra dhe shpifje të ulëta dhe kundërligjore. Për dallim nga disa, unë e shkruaj këtë artikull që t’i tregoj vlerat e kandidatit tim, me shpresë se kur të informohen edhe të tjerët do të më bashkohen në bindjen se Prof. Dr. Isa Mustafa duhet të jetë kryetari i ardhshëm i Prishtinës. Besomëni se zgjedh këtë qasje, jo pse nuk kam arsenal që t’i njollosi të tjerët, mirëpo kultura ime familjare, profesionale dhe politike më shtyn në këtë drejtim të civilizuar. Ka shumë arsye pse Prof. Dr. Isa Mustafa është kandidati më i përkryer për postin që kërkon. Së pari, Prof. Dr. Isa Mustafa është një njeri që për dallim nga shumica e klasës politike në Kosovë, është përkrahës i denjë i kuadrove të reja dhe vlerësues i mundësisë së tyre që të kontribuojnë. James Freeman Clarke, një vizionar i njohur amerikan, pati thënë: “Një politikan mendon për zgjedhjet e ardhshme, ndërsa një burrë shteti mendon për gjeneratën e ardhshme”. Sipas këtij definicioni, Prof. Dr. Isa Mustafa është një burrë shteti. E them këtë sepse gjatë fushatës, mirëpo edhe më parë, është vrojtuar se Prof. Dr. Isa Mustafa përreth tij mban kuadro të reja që kanë aftësi të jashtëzakonshme të përfituara nga përvoja akademike dhe profesionale brenda dhe jashtë Kosovës. Dy nga këshilltarët e tij, që njëheri janë shtylla përkrahëse të Prof. Dr. Isa Mustafa si Kryetar i kryeqytetit, përkatësisht z. Arben Gashi dhe z. Asdren Osaj, janë dy profesionistë që gëzojnë respektin më të lartë për të arriturat dhe aftësitë e tyre. E ata janë vetëm dy nga shume kuadro të tjera të reja që ka Prof. Dr. Isa Mustafa në dispozicion. Si kuadër e ri, edhe unë i jam mirënjohës shume Prof. Dr. Isa Mustafa. Dy vite më parë, kur i braktisa të gjitha sukseset që i pata në SHBA dhe vendosa t’i kthehesha Kosovës, ishte po ky njeri që më hapi derën e parë të inkuadrimit në shoqërinë kosovare dhe më ofroi angazhim në atëherë Universitetin Riinvest. Që nga atëherë, bashkëpunimi i ynë dhe shkëmbimi i këshillave është i rregullt dhe i mirëfilltë. E përmendi përkrahjen e të rinjve nga Prof. Dr. Isa Mustafa për arsye se kjo qasje e Prof. Dr. Isa Mustafa i jep atij mundësinë që t’i ofrohen ide të reja. Gjaku i ri, natyrisht se ofron ide të reja, që Prof. Dr. Isa Mustafa i ka shfrytëzuar dhe do t’i shfrytëzojë për të mirë të kryeqytetit tonë. Të gjithë besoj se pajtohemi se Prishtina, dhe Kosova në përgjithësi, ka tepricë të ideve të vjetra dhe deficit të ideve të reja. Si vlerë e dytë, Prof. Dr. Isa Mustafa është ekonomist dhe menaxher i mirëfilltë. Në këtë profesion, Prof. Dr. Isa Mustafa është dëshmuar si akademik i vlerësuar lartë edhe nga kritikët që ia kanë më së shumti zili. Ai ka botime shkencore në atë sferë dhe si pjesë e Institutit Riinvest ka kontribuar në shumë punime dhe hulumtime shkencore që kanë shërbyer si bazë për ndërtimin e ekonomisë së tregut që ne sot e gëzojmë. Përveç asaj, Prof. Dr. Isa Mustafës i janë besuar mijëra studentë të ekonomisë që atyre t’ua japë themelin e njohurive të tyre në sferën e ekonomisë. Një pjesë e madhe e ekonomistëve të rinj në Kosovë kanë nderin që Prof. Dr. Isa Mustafës t’i drejtohen si “Prof.” Dhe besoj, duke njohur mundësitë e tij akademike dhe profesionale, shumica e tyre me krenari edhe i drejtohen atij me titullin “Kryetar.” Edhe kjo vlerë është drejtpërdrejtë e lidhur me udhëheqjen e një entiteti buxhetor siç është Prishtina, që kërkon menaxhim mikro-ekonomik dhe konzervatizëm fiskal për arsye të buxhetit të vogël. Njohuritë e “Profës” në sferën e ekonomisë dhe menaxhmentit kanë zbatim të drejtpërdrejtë në postin që ka dhe do të ketë për katër vitet e ardhshme. Si person i qendrës se djathtë, Prof. Dr. Isa Mustafa manovron me resurse njerëzore dhe financa me konzervatizëm dhe përqendron ato në projekte që rezultojnë në zhvillim ekonomik të qytetit, e jo në projekte populliste që shpeshherë janë të kota dhe nuk sjellin asgjë të vlefshme për kryeqytetin. Se treti, Prof. Dr. Isa Mustafa po e tregon veten si një aset i fortë i partisë së cilës i takon. Ai zotëron përkrahjen e qytetarëve të Prishtinës, pra përafërsisht 1/4 të elektoratit të Republikës. Në këtë pikëpamje, ai tash prezanton një rrezik për të gjithë armiqtë e tij politik. Pavarësisht nga kjo fuqi, Prof. Dr. Isa Mustafa është i përkushtuar që këtë fuqi elektorale ta përdorë për të mirën e kryeqytetit. Investimet e bëra në Prishtinë gjatë mandatit të tij si Kryetar u bënë në të gjitha anët e saj, pavarësisht se a kishin votuar ato anë të qytetit për Prof. Dr. Isa Mustafa apo dikë tjetër. Pra, edhe një herë, Prof. Dr. Isa Mustafa e tregon veten si udhëheqës që përdorë fuqinë e tij në mënyrën më të mirë të mundshme, për të mirë të të gjithë atyre ndaj të cilëve është i përgjegjshëm. Dhe në fund, vlen të ceket se Prof. Dr. Isa Mustafa është punëtor i madh me një etikë mahnitëse të punës. Unë jam personalisht dëshmitar i përkushtimit të tij të pafund për ta bërë Prishtinën, mirëpo edhe Kosovën, një vend që tejkalon edhe pritjet tona më të larta. Etika e tij e punës është dëshmuar edhe dy vitet e kaluara. E vërtetë është që Prof. Dr. Isa Mustafa nuk e ka shndërruar Prishtinën në një mini-Pariz apo një version Kosovar të Uashingtonit. Po e vërteta tjetër është se nuk ka njeri të gjallë që do ta bënte atë. Çka vlen të ceket është se me veglat që i janë dhënë, Prof. Dr. Isa Mustafa ka bërë maksimumin. Ka ndërtuar shumicën e rrugëve të kryeqytetit, ka krijuar parqe të bukura (lagjja ime është përfituese, prandaj faleminderit Kryetar), ka ndërtuar qendra mjekësore, ka pastruar qytetin (edhe pse ne qytetarët shpesh po e sfidojmë me moskulturë qytetare duke hedhur mbeturina vend e pa vend), dhe diçka që ka gëzuar shumë babain tim, ka zvogëluar tatimin në pronë. Përveç atyre që përmenda, Prof. Dr. Isa Mustafa ka bërë edhe shumë gjëra të tjera që janë shumë për t’i përmendur të gjithat këtu. Dhe natyrisht, ka edhe shumë punë tjera që mbeten për t’u bërë. Po, pikërisht për këtë, Prishtina do t’ia jep Prof. Dr. Isa Mustafa edhe katër vite si Kryetar, që ai të bëjë maksimumin me buxhetin modest që ka Prishtina. Këto që i përmenda janë vetëm disa nga shume vetitë dhe vlerat pozitive që i ka Prof. Dr. Isa Mustafa. Ju nxis që të krahasoni të gjitha këto vlera që ka Prof. Dr. Isa Mustafa me vlerat e kandidatëve të tjerë. Besoj se nuk kam nevojë t’ju them se kush e meriton votën tonë! (Autori është Këshilltar për Çështje Juridike i Presidentit të Republikës së Kosovës. Pikëpamjet e paraqitura në këtë tekst janë personale)

Më shumë Opinione

Mundësuar nga VEVI Networks